Panamo kontraŭstaras ekologian iniciaton

Ne sufiĉis la monda mokado, kiun kaŭzis la subteno de nia registaro al la barbara celo de la balenĉasado, donita laŭ peto de Japanio, kiam Panamo havas nenion komunan kun tio.

Ankaŭ ne sufiĉis la ridindaĵo, kiun faris nia registaro, fariĝante la lasta aliĝinta al la Koalicio, laŭ peto de Usono, unu semajnon post kiam la ceteraj landoj esprimis sian pozicion pri la milito en Irako sen la rajtigo de la Unuiĝintaj Nacioj. Konsiderante, ke Panamo ne havas — dank’ al Dio — armeon, nek efike kontraŭbatalas la kolombiajn neregulajn batalantojn, kiuj teruras la darienanojn ĉiutage, multaj sugestis, ke nia registaro serĉis la ekonomiajn profitojn de ĉi tiu subteno.

La registaro de Panamo denove sukcesis hontigi nin internacie. Denove, la akomodiĝema dorso de la kreola1 politikado klinis sin antaŭ la interesoj de eksterlandaj potencoj, anstataŭ agi surbaze de tio, kio ĝustas.

Laŭ raporto de hodiaŭ de El Mundo, rilate al protesto de la NRO Monda Fonduso por la Naturo (WWF), Panamo subtenis, kune kun Liberio, proponon de Rusio por bloki iniciaton por protekti sentemajn marajn zonojn de la Kanariaj Insuloj kaj Galapagoj kaj de la Balta Maro, kiu devus esti ekzamenata en kunsido de la Komitato por la protekto de la mara medio de la Internacia Mara Organizo (IMO) en Londono la venontan semajnon. Tiu ĉi mezuro estas necesa por eviti, ke ripetiĝu mediaj katastrofoj kiel tiu kaŭzita de la sinkado de la petrolŝipo Prestige, kiu lasis bilancon de tricent mil mortintaj birdoj kaj purigan koston taksitan je kvin miliardoj da eŭroj.

Ĉu iun surprizas, ke Panamo kaj Liberio, la du plej grandaj eldonantoj de oportunaj flagoj en la mondo, estas tiuj, kiuj donas sian subtenon al tiel bedaŭrinda afero? Kion alian oni povas atendi de registaroj kutimaj vendi ĉiutage la flagon de sia patrujo al fremdaj ŝipoj? Tiel, ankoraŭfoje, la registaro de Panamo proponas sian kunkulpan subtenon por kontraŭstari bande justan ekologian mezuron, serĉante la malnoblajn ekonomiajn profitojn, kiujn ĝi ricevas plaĉante al eksterlandaj potencoj.